長沙灣不設限期的臨時塗鴉

 

行緊出東京街，經過一個臨時咗好耐嘅臨時停車場，因為一直都冇樓喺度起，所以仲係爛地一笪，外面有啲大水泥圍住，俾我發現有啲公仔畫咗上去。

一個人拖住一個人，有人着緊校服，有人着緊普通T恤，呢兩種穿搭重重複複。仲記得2019年嗎？一個還有社運的年代，人鏈作為當時其中一種抗爭方式，儘管左右拖着嘅都係陌生人，但都知道大家當下心入面諗緊啲咩。

每一日都有咁多人經過呢個停車場，但係真正留意水馬上嘅塗鴉又有幾多個呢？仲記得呢段歷史嗎？事隔六年，社會慢慢不再容納反對的聲音，進入了一個資訊封閉的時代，要忘記真係好容易，要記得住都只係靠流傳落嚟嘅文字圖畫...其實我估直行轉右仲有呢啲塗鴉嘅，但係嗰邊全部都被重新鋪上左灰色嘅油漆，唯獨得返相片嗰個位淨係鋪咗少少油漆，遮住咗每一個人臉。我喺度諗：畫呢啲塗鴉嘅人，佢一定係一個有想法嘅人；而鋪上新油漆嘅人，佢一定仲有保留歷史嘅心。

隔咗咁多年，冇鋪新灰色油漆嘅位，都開始甩色。