關於承諾

 我一直覺得「𠄘諾」呢家嘢係bull shit,人本應不需要承諾。

結婚嗰陣，你哋下定承諾：「無論順境逆境，無論富裕貧窮，一生一世陪伴着你…」實際上，點都有啲人唔會遵守承諾，出軌嘅繼續出軌，家暴嘅繼續家暴。到底呢啲口頭上嘅「承諾」，係為咩呢？儀式感？安心？隨波逐流？如果係真正相信一個人，其實使乜「承諾」啊～睇嚟呢個關乎到人與人之間嘅信任。嗰個人值得信任嘅，自自然然「承諾」都只會係配搭，可有可無的，甚至乎去到 完全忘記咗段「承諾」，但係都仲履行緊「承諾」入面嘅嘢 嗰個程度。

我重新思考「承諾」呢樣嘢係為咩，諗嚟諗去都係覺得：只不過增加負擔，增加束縛，減少自由。人點都有啲責任心，正常都會有一種「講得出就要做得到」嘅觀念，小學都有教啦，所以就算我點唔鍾意承諾都好，有時候無可避免地被迫應承一樣嘢，做唔到嘅我都會有啲羞恥，或者係對唔住對方。產生出呢啲負面嘅感受，等同於俾壓力自己，你會想嘗試實現應承咗人嘅嘢，做到俾人感覺係應該嘅，所以你唔會特別開心，但係如果真係做唔到呢？反而會大大影響到你自己嘅情緒。

人真係唔需要「承諾」㗎…點解要....

利申：我所講嘅「承諾」指嘅係口頭上應承嘅嘢，而唔係有法律效應嘅，例如係簽合約之類，畢竟有法律效應嘅你點都要遵守，唔可以話唔鍾意就唔做。

-------------------------

果然豬仔包都係一個專注於相處，所以永遠都係講一啲好難有專業數據嘅話題，始終都好少見人思考 人與人之間嘅承諾到底係有冇必要 呢個問題，但係呢啲話題永遠日日都存在於我哋身邊。