交友app使用守則

 唔好成日話玩交友app識唔到人／唔識玩！不如試吓先提升自我吸引力先？

睇人唔在乎都係睇性格、能力，敷衍啲就睇外表，你對自己有一定嘅要求，整靚個profile 佢，真係唔信你識唔到，甚至乎有更多嘅選擇… （至少我一個普普通通嘅女仔都做到）我冇一個定死嘅methods 教人點提升吸引力，講真…每個人唔同，點教啫！但可以分享下我嘅「方法」：

一定要搵到自己嘅價值。我由細到大讀書唔叻，咁咪要向技能方面努力，發掘下自己想學乜，再從中發展。成個過程會令你好surprised，幾年前嘅我點都冇諗過自己會寫文／詩，搞一個組織，開page同大家分享自己啲作品。可能有啲嘢你試過，但最後失去咗興趣，惟有放棄（如何重新點燃熱情有機會再講）但尋覓興趣真係不斷進行㗎！至少你對世界仍然有好奇心，你冇樣嘢成功，但都叫做上進呀！^ ^

唔做自私嘅人，保持大方。亦都係羣體之中需要嘅嘢，應該冇人鐘意啲出街同你計到盡、食飯唔同你些牙、紙巾都唔俾張你嘅人吧... （誇張咗）喺交友app俾你約到人出嚟，如果你對佢有好感，你咪主動請下佢食飯，送啲禮物氹下佢囉～哈哈！如果你哋同時都帶咗份禮，知咩科啦～（或者呢個係儀式感）想長keep?試吓唔好咁斤斤計較：3 因為真係又麻煩又黑人憎⋯

避免被社會框死。我試過約咗個男人，男人話：「點解你咁操老，我識啲女仔都好溫柔，好優雅。」我當下好想反白眼呀！我認為跳出框架，都可以減少比較，最後就自然冇乜憎恨。我最多唔啱你，咁你就收下把口，企硬嘅人係唔會因為「被覺得唔同」而改變：）反而當呢啲人暴露咗出嚟，就會即刻對佢印象差咗，所以對一個人，記住佢就係佢。

加油吧，交友app識到人，仲要長keep真係唔難！