《在浮城的角落唱首歌》麥海珊
其實好耐之前已經睇過一次，但最近又想睇返，更加專心咁睇。然後我又諗到好多零碎嘅嘢，所以想嘗試寫出嚟。
本豬睇呢類記錄片嘅次數五隻手指數得哂，好少見香港有片係講獨立音樂，甚至係藝術同社運嘅關係，可以透過一啲故事去俾人反思一啲漸漸失去嘅東西。我認識嘅麥海珊除咗AMK同性別議題，仲係一個好專注於空間、昔日香港嘅藝術家，係少數會企出嚟發聲嘅藝術家。(keke 最近了解多咗發覺同佢嘅諗法都相似咁，所以十卜十卜吖！)
套戲入面分成三個部分：阿p@My Little Airport 喺牛頭角工廈嘅生活、Dejay@the pancakes 重返石蔭村、Billy@迷你噪音喺尖沙咀唱歌悼念六四。(作為一個indie仔 正呀！）每個部分以佢哋自己揀嘅歌作結，而拍攝地點都係圍繞佢哋生活嘅地區。都係啲重建過嘅地方或者回憶，套戲已經係十年前，十年後好多情節好難再出現，好多位令我反思宜家嘅香港。作為一個00後，只能透過紀錄片/文字去睇上一代香港人嘅團結同堅持，望梅止渴，無法唔承認香港某啲方面已經變得更差。
紀錄片入面提到啱啱踏入10年代，政府搞「活化工廈」，結果不但冇變得多元化咗，反而仲俾大集團收購哂啲工廈嚟賺錢，搞到一班獨立藝術工作者因貴租迫住要離開。聽到都可悲，我自己本身好唔鐘意一啲大集團壟斷嘅行為，因為通常佢哋腦入面諗嘅都係錢、點賺錢同點賺多啲錢，最終錢係賺到，但藝術工作者、創業人士⋯⋯呢啲小商戶會被拋棄，香港喺新時代變得一式一樣，失去咗原有嘅特色。工廈一直都係一班搞獨立音樂、搞創作、搞文化嘅集中地，有啲仲係自由工作者，成日聽人講搞藝術搵唔到食，係㗎！收入係好唔穩定㗎！但係政府同班高官有冇考慮過新政策係一種剝削？冇，佢哋只不過都係利用「活化」嚟賺錢！結果有目共睹，香港創作產業冧檔...之所以出曬名叫「文化沙漠」，唔係冇人行呢行，往往政策上先係最大嘅兇手。十年前已經咁，十年後更加嚴重，連最後喘氣嘅空間都冇，以前都叫有班小市民遊行集會寫信去點醒政府，宜家各種打壓冇人敢講，仲大規模(指成個香港，唔只係工廈）趕走好多藝術家，創作不外乎反映生活、政治、環境...我諗一啲特別有深度嘅創作好難再出現。可憐嘅係政府口裏依然話要發展好藝術，但班高官啲suggestions除咗好好笑，都唔太實際，不如交返俾市民自發搞啦！擺下地攤、喺廣場表演、busking 唔好趕客咪幾好，真係宜家先話會阻街，以前先冇呢啲講法。
「市面買得好嘅都有危害社會嘅元素」
Dejay 童年住舊石蔭村，今次真係重遊舊地，雖然重建咗，但人情味仍在。以前啲街坊仍然留喺呢區，葵涌畀我感覺係一個比較和諧嘅社區，因為唔係旺區，嚟嚟去去出街都會遇都同一班鄰居街坊。我以前細個係住新石蔭村，7-8年前搬走咗之後冇返過去，啱啱幾個月前特登返返去，行下條村、細個成日去嘅公園，去石蔭商場嘅餐廳食Lunch，可能太耐冇返去，莫名有種熟悉而陌生嘅感覺。嗰度啲人真係特別chill，但年青人比例上少啲，可能因為我去嘅都係休閒地方。好記得我喺公園見到嗰個女仔坐喺太陽曬住嘅草地，同埋嗰個做緊運動嘅婆婆問我係咪蕩失路，我唔係蕩失路啦！只係想喺度望多幾眼啫~香港到底仲有冇人情味？個人覺得老一輩啲情感會豐富啲，唔知係留戀昔日街坊情定無聊搵偈傾，多老人家嘅地方必定有人情味。佢喺天橋唱《How much do we remember 》嘅時候，啱啱開始就被打斷，等到啲人要走過先繼續，有人話阻住哂，有人話「唱得幾好，繼續吖！」或者呢個係佢對人嘅一種尊重吧，亦都係以人為本。
之後講到六四，我並唔係親身經歷過嘅人，但片中嘅佢哋係。以往每年六月三號四號都會組織埋一齊紀念六四，除咗支聯會喺維園搞集會，原來仲有一班人會出去尖沙咀文化中心對出嘅自由戰士自發地悼念。獻上花、讀下詩、唱下歌咁，到底你會點樣使用一個廣場呢？我收集咗片中唔同人嘅答案，主要都講廣埸係一個為人民而設、一個休息嘅地方、一個想做咩就做咩嘅地方。入面有句我特別記得：當有人喺度打開張banner，就會有一堆人過嚟傾偈，嗰陣時冇非法集會嘅概念。根本就冇人理你，只要唔係殺人放火其實都冇問題，「我知道呢個係自由，實實在在嘅自由」。我諗香港唔同嘅廣場都好幾年冇公眾集會，或者係由市民自發搞嘅活動咁，宜家比較大規模嘅活動多數由政府或者NGO搞，可能真係好驚犯咗法都唔知，始終2019年後好多嘢都變咗。我比較重視社會氣氛嘅不同，一有人搞集會發聲就有人嚟鼓掌支持，條片錄咗423藝術公民大遊行其中一個畫面我好鐘意：啲人飛紙上個天嗰刻，呢個係真正嘅熱鬧，有一種由一班小市民發出強大凝聚力嘅感覺，可能所有集會嘅意義就係引起大眾知道有一班人為呢仵事發聲咁。唔知下一代有冇機會見識吓呢個氣氛呢？我成日覺得90-00後係香港嘅最後一代（睇人啦），自己細個都成日睇電視，嗰陣仲有城市論壇、有香港卡通片、新聞會報有人集會遊行，最後一次真正接觸自由已經係2019嗰陣屋企附近成條街都企滿着黑衫嘅人嗌口號，當時覺得好震撼。各種社會事件造就咗而家嘅我，一個想發聲嘅小女孩，好可悲嘅係，政治打壓會少咗啟發下一代去關注社會議題嘅機會，真係希望廿年後喺香港繼續有反對嘅聲音。（好似越講越離題，不過冇所謂啦，都係我想講嘅嘢）
#有機會一起悼念六四吧
